Tiranë, 20.12.2024, nënshkruhet për herë të parë një “Memorandum Bashkëpunimi”, mes përfaqësuesve të katër dhomave të profesioneve të lira ligjore në Shqipëri, të Avokatisë, Noterisë, Përmbarimit Gjyqësor Privat dhe Ndërmjetësimit.
Avokatët, noterët, përmbaruesit gjyqësorë privatë bashkë me ndërmjetësit, vendosën të hedhin një hap të qartë në mbrojtje të interesave të tyre profesionale, por mbi to, për mbrojtjen e të drejtave të qytetarëve të cilëve u shërbejnë.
Promovimi pozitiv dhe bashkëpunimi për ndërgjegjësimin publik mbi rëndësinë e profesioneve të lira ligjore në Shqipëri, është kthyer në imperativ.
Me këtë synim u nënshkrua “Memorandumi i Bashkëpunimit” mes katër Dhomave, si hap i parë që do të ndiqet nga një veprimtari intensive e angazhimit të përbashkët.
Përfaqësuesit e katër dhomave me nënshkrimin e memorandumit mes tyre, vendosën të thërrasin në 23 dhjetor 2024, “Forumin I të Profesioneve të Lira Ligjore në Shqipëri”, një iniciativë që do të ftojë një bashkëpunim më të gjerë, ku të përfshihen të gjithë profesionet e të lira, përveç atyre juridike – ligjore.