Tiranë – 1.2.2025.
Në sallën e konferencave në Ministrinë e Drejtësisë u mbajt mbledhja e Asamblesë së Përgjithshme të DHKPGJP-së. Përmbaruesit privatë, në forumin e tyre më të rëndësishëm, vendosën piketat e vitit të tyre profesional – 2025. Ata shënuan me vendime të rëndësishme piketat brenda të cilave do të zhvillohet veprimtaria e tyre vjetore, duke përcaktuar edhe kufijtë e orientimit të saj profesional.
Asambleja e 1 shkurtit 2025 i vendosi përmbaruesit privatë para zgjedhjes së alternativave të mprehta për arritjen e qëllimeve dhe synimeve në mbarëvajtjen e profesionit.
Kryetari i Dhomës, z. Tedi Malaveci, në hapjen e mbledhjes, shpalosi një panoramë të gjendjes së shërbimit përmbarimor privat shqiptar, pozicionit tejet të vështirë të përmbaruesit privat, i rënduar më shumë përgjatë vitit 2024, situatë që për shumë anëtarë ishte kthyer në dilemë të vazhdimit apo lënies së profesionit.
Kryetari i Dhomës, në ekspozenë hyrëse të tij, iu drejtua Asamblesë, ndër të tjera, me fjalët:
“Alternativa për të gjetur një punë tjetër, qoftë edhe pa kostumin e përmbaruesit, është aty. Por a duhet ta braktisim profesionin që bëjmë prej 25-20-15-10 vjetësh? Kësaj pyetjeje mund t’i jepet përgjigje nga kjo asamble sot – nëse do të zgjedhim braktisjen kolektive, le ta bëjmë të gjithë bashkë, e jo të shkojmë një e nga një drejt një fundi të sigurt!”
Kryetarja e Këshillit Drejtues të Dhomës, znj. Najada Beqaraj, parashtroi para Asamblesë situatën e pandryshuar të mosrespektimit të detyrimeve ligjore nga Ministria e Drejtësisë dhe Ministria e Financave, të cilat prej 5 vitesh, në kundërshtim të detyrimeve që burojnë nga ligji 26/2019, refuzojnë miratimin e një udhëzimi të përbashkët mbi tarifat fikse të shërbimit përmbarimor gjyqësor privat. Znj. Beqaraj propozoi para Asamblesë ndërmarrjen e një plani veprimesh të përshkallëzuara për të rifituar dinjitetin profesional të anëtarësisë aktive të DHKPGJP-së.
Pas diskutimeve dhe propozimeve të ndryshme, Asambleja vendosi t’i drejtohet zyrtarisht Kryeministrit, Ministrisë së Drejtësisë dhe Ministrisë së Financave me një kërkesë në formën e një thirrjeje për reflektim, me pikë kryesore publikimin pa asnjë vonesë të aktit nënligjor që vendos për tarifat fikse të shërbimit përmbarimor gjyqësor privat. Kërkesë – Thirrja zyrtare drejtuar autoriteteve të larta shtetërore u miratua nga Asambleja e Përgjithshme pasi u lexua para saj nga Kryetari i Dhomës.
Një vendim tjetër i rëndësishëm, marrë në Asamblenë e DHKPGJP-së, ishte ai që i adresohet Kuvendit dhe, në veçanti, Komisionit për Çështjet Ligjore, Administratën Publike dhe të Drejtat e Njeriut, duke kërkuar që, në shqyrtimin e nismës legjislative të propozuar më 31.12.2024 për ndryshimin e Kodit të Procedurës Civile, veçanërisht të nenit 511 për “decentralizimin e urdhrit të ekzekutimit”, subjekti më i përshtatshëm dhe i përzgjedhur nga ndryshimet e synuara të jetë përmbaruesi gjyqësor.
Për këtë qëllim, Asambleja miratoi dërgimin e një kërkese zyrtare Kuvendit të Shqipërisë dhe Komisionit për Çështjet Ligjore për orientimin e tyre mbi standardet më të mira ndërkombëtare sa i përket nismës së decentralizimit të lëshimit të urdhrit të ekzekutimit, të pasqyruara në një draft-propozim të detajuar, dërguar nga DHKPGJP-ja.
Pas këtyre vendimmarrjeve tejet të rëndësishme, Sekretarja e Përgjithshme e Dhomës, znj. Jonida Ujkashi, prezantoi një propozim të Këshillit Drejtues për shtimin dhe ndryshimin e disa pikave në Statutin e Dhomës. Pas diskutimeve, debatit dhe propozimeve mbi këtë çështje, Asambleja vendosi të shtyjë vendimmarrjen mbi ndryshimet në Statut për në Asamblenë tjetër, që do të zhvillohet në fund të vitit 2025.
Në vijim të mbledhjes, Asambleja, pas diskutimeve mes anëtarëve të saj, mori vendime që lidhen me mbarëvajtjen e aktivitetit të Dhomës.
Asambleja e Përgjithshme:
– Miratoi, sipas raportit financiar vjetor, realizimin e buxhetit të Dhomës për vitin 2024;
– Miratoi projektbuxhetin e propozuar të Dhomës dhe QKTP-së për vitin 2025;
– Miratoi kuotën vjetore të anëtarësisë për vitin 2025, në masën e pandryshuar prej 50 000 lekësh.
Asambleja e Përgjithshme u karakterizua nga një atmosferë diskutimesh dhe debati konstruktiv mes kolegëve, ku nuk mungoi kërkesa për llogaridhënie nga organet drejtuese të Dhomës dhe përgjigjet për çdo interesim të anëtarësisë, sa i përket mbarëvajtjes së profesionit dhe angazhimeve konkrete për realizimin e tij.
Kolegët e Asamblesë së Përgjithshme, përveç diskutimeve të rëndësishme në sallën e mbledhjes, ndanë e shkëmbyen eksperiencat, diskutimet shoqërore dhe profesionale në një pushim dreke të organizuar në ambientet e Ministrisë së Drejtësisë.
Mbledhja e Asamblesë, pas miratimit të vendimmarrjeve shumë të rëndësishme, përfundoi me besimin se solidariteti dhe qëndrimi kolegjial pa ekuivokë në mbrojtje të kauzës së përmbaruesit është e vetmja rrugë që do të sigurojë suksesin e profesionit.
